Á döfinni

Í gær, 29. september, var opnuð ný sýning á safninu sem kallast Snemma beygist krókurinn. Er þetta yfirlitsýning á verkum Bjarna Jónssonar listmálara. Sýningin var sett upp í tilefni af því að Bjarni hefði orðið 75 ára 15. september s.l.

Frá og með 16. september breytist opnunartími safnsins. Yfir veturinn mun það vera opið frá kl.11:00-17:00 alla virka daga nema lokað mánudaga. Um helgar verður safnið opið frá kl. 13:00-17:00. Safnbúð og Safnkaffi eru opin á sama tíma og safnið.

Víkin býður gesti velkomna á safnið á Menningarnótt. Að venju verður mikið í gangi á safninu og í tilefni dagsins er frítt inn. Gestir geta gengið um og skoðað hinar fjölbreyttu sýningar sem safnið hefur uppá að bjóða. Safnkaffið mun hafa ljúffengar veitingar til sölu og verður hægt að njóta þeirra við eitt besta útsýnið í Reykjavík. Varðkipið Óðinn verður opið og aldrei að vita nema að hægt verði að finna einhverja af fyrrverandi áhafnarmeðlimum skipsins um borð. Þegar kvölda tekur verður slegið upp dansleik á safninu og mun Harmonikkufélag Reykjavíkur leika fjöruga tónlist.

Nýtt Safnkaffi var opnað í Víkinni í sumarbyrjun og hefur það fengið afar jákvæðar viðtökur. Enda býður Safnkaffið upp á frábærar heimatilbúnar veitingar og einstakt útsýni yfir gömlu höfnina! Í veitingunum er lögð megin áhersla á þjóðlega rétti sem gerðir eru á staðnum úr úrvals hráefnum. Má þar m.a. nefna heimabakað rúgbrauð með bragðmiklu hangikjöti og innan skamms verður boðið upp á heimalagaðar íslenskar súpur í hádeginu og annað fiskmeti eins og saltfiskbollur. Allir geta heimsótt Safnkaffið eingöngu og notið þjóðlegra veitinga og hins stórkostlega útsýnis yfir höfnina, annað hvort innandyra eða utandyra í góðu veðri á útsýnispalli safnsins!

Sunnudaginn 12. júlí næstkomandi verður íslenski safnadagurinn haldinn hátíðlegur. Frítt verður inn á safnið og girnilegar kökur til sölu á safnkaffinu. Óðinn verður opinn fyrir gesti og gangandi.

Frábært safn fyrir alla fjölskylduna, verið velkomin!

Á Hátíð hafsins voru opnaðar þrjár nýjar sýningar. Það eru sýningarnar Saga seglanna, Hafnarfjarðarhöfn í 100 ár sem er farandsýning í nýjasta sal safnsins og sýning frá félagi íslenskra bútasaumskvenna Hafið.

Hátíð hafsins fór fram helgina 6.-7. júní og heppnaðist með eindæmum vel. Borgarbúar voru duglegir að mæta hingað á Grandann til að taka þátt í hátíðarhöldunum og fjölbreytt dagskrá skemmti allri fjölskyldunni.

Það er mikið um að vera á Víkinni næstu helgi, 6.-7. júní. Hátíð hafsins verður haldin á Grandanum með fjölbreyttri og skemmtilegri dagskrá og heilmikið verður um að vera á safninu. Nýjar sýningar verða opnaðar, meðal annars sýningin Hafið á vegum íslenska bútasaumsfélagsins og kaffihús safnsins verður opnað. Frítt verður á safnið alla helgina og allir velkomnir.

Víkin-Sjóminjasafnið verður lokað frá 20.-29. maí vegna breytinga. Við opnum aftur 30. maí með nýrri ljósmyndasýningu og glæsilegu safnkaffi þar sem verður hægt að njóta skemmtilegasta útsýnisins í Reykjavík.

Sjóminjasafnið í Reykjavík býður gesti og gangandi velkomna í safnið á Ferðafagnað 2009, laugardaginn 18. apríl. Skemmtileg dagskrá fyrir alla fjölskylduna og frítt er á safnið.