Á döfinni

Þorgerður Katrín Gunnarsdóttir, menntamálaráðherra, og Einar K. Guðfinnsson, sjávarútvegsráðherra, undirrituðu 14. desember 2006 samkomulag við Víkina – Sjóminjasafnið í Reykjavík um fjárhagslegan stuðning við uppbyggingu safnsins á næstu þremur árum. Samtals nemur styrkurinn 30 milljónum króna og fær safnið 10 milljónir árlega næstu þrjú árin, frá 2007 – 2009.

Sigrún Magnúsdóttir, Stefán Jón Hafstein, Einar K. Guðfinnsson og Þorgerður Katrín Gunnarsdóttir undirrituðu samkomulagið í lúkar safnsins úr gömlu síðutogurunum.

Helgin 2. til 3. desember var síðasta sýningarhelgi ársins í Sjóminjasafninu. Safnið verður opnað á ný laugardaginn 13. janúar. Ljósmyndasýningin Í síldinni á Sigló og sýning á gjöf hjónanna Hinriks Bjarnasonar og Kolfinnu Bjarnadóttur, Úr ranni forfeðranna, verða teknar niður á fyrstu mánuðum næsta árs. Sýningin Togarar í 100 ár verður endurskoðuð á haustdögum 2007.

.

Konráð Sæmundsson, fyrrverandi sjómaður, kom 14. nóvember sl. færandi hendi með muni til Víkurinnar – Sjóminjasafnsins í Reykjavík og varð hundraðasti maðurinn frá upphafi sem gefur safninu muni. Um var að ræða þrjú skipslíkön sem hann hafði smíðað sjálfur. Tvö þeirra voru af skipum sem hann hafði verið á nokkrar vertíðir á síld, Sjöstjarnan EA 365 og Ester EA 8. Þriðja skipið er frá því fyrir hans tíð, þ.e. af kútter.

Hollvinasamtök varðskipsins Óðins voru stofnuð 26. október s.l. að viðstöddu fjölmenni í Víkinni – Sjóminjasafninu í Reykjavík. Björgum Óðni, sögunnar vegna eru einkunnarorð þessara nýju samtaka, sem stofnuð voru að frumkvæði Sjómannadagsráðs eftir tillögu Guðmundar Hallvarðssonar, þingmanns og formanns ráðsins. Markmið samtakanna er að gera Óðinn að sögusafni þorskastríðsáranna og því komið fyrir í höfninni framan við Sjóminjasafnið.

Stofnfundur Sambands íslenskra sjóminjasafna var haldinn í Sjóminjasafninu í Reykjavík 15. október s.l. að viðstöddum fulltrúum þeirra safna sem undirrituðu lög og stofnskrá sambandsins. Á fundinum kom fram að stofnun sambandsins er stórt skref sem aðstandendur vonast til að skili gifturíkum árangri. Margrét Hallgrímsdóttir, þjóðminjavörður, stjórnaði stofnfundinum og taldi stofnun sambandsins vera "afar farsælt skref" við uppbyggingu sjóminjasafna á Íslandi.

Óhætt er að fullyrða að gamla BÚR húsið við Grandagarð sé í mikilli endurnýjun lífdaga um þessar mundir. Sjóminjasafnið er nú langt komið með að innrétta og taka í notkun allt sitt húsnæði og einnig er suðurendi hússins tilbúinn undir fyrirtækin sem þar starfa. Þá hefur verið mikið líf og fjör í húsinu síðustu vikur og mánuði, Matarsetur að taka á sig mynd á neðri hæð og leiksýningar gengið fyrir fullum sal. 

Hinrik Bjarnason og Kolfinna Bjarnadóttir hafa afhent Víkinni – Sjóminjasafninu í Reykjavík, minjasafn sitt sem þau hafa komið sér upp í áratugi. Um er að ræða nærri 700 muni. Formleg afhending fór fram 31. maí sl. og um leið var opnuð sýning á þessu einstaka minjasafni hjónanna sem ber heitið Úr ranni forfeðranna. Þessi höfðinglega gjöf er mikill virðingarvottur við ársgamla sjálfseignarstofnun um Sjóminjasafn í Reykjavík.

Hinrik Bjarnason flytur ræðu við afhendinguna. Sigrún Magnúsdóttir, forstöðumaður Sjóminjasafnsins, fylgist með.

Miðvikudaginn 19. apríl s.l. undirrituðu Sigrún Magnúsdóttir, forstöðumaður Sjóminjasafnsins, og Hermann Guðjónsson, siglingamálastjóri, samning milli Siglingastofnunar Íslands og safnsins um varðveislu gripa frá Siglingastofnun. Í samningnum felst að Sjóminjasafnið tekur minjar og muni frá Siglingastofnun til varðveislu og skráningar og mun nota þá í miðlun og sýningarhaldi eftir því sem tilefni er til hverju sinni. Ýmis konar munir og minjar frá starfseminni hafa varðveist í fórum Siglingastofnunar.

Stjórn Faxaflóahafna hefur ákveðið að fjármagna á þessu ári klæðningu og einangrun á húsnæði Sjóminjasafnsins. Undirbúningur framkvæmdanna er þegar hafinn og er nú unnið að hönnun á klæðningu og framtíðarútliti gamla BÚR hússins. Hér að neðan má sjá hugmynd að útliti hússins með nýjum inngangi frá höfninni, en þar verður aðalinngangur safnsins til framtíðar litið, þó svo að áfram verði inngangur frá götunni. Nýji inngangurinn er hannaður með nýtt skipulag við höfnina sem taka mun við þegar nýja Mýrargötuskipulagið verður orðið að raun innan fárra missera.

Starfsmenn Landhelgisgæslunnar hafa hrundið af stað undirskrifasöfnun þar sem þess er farið á leit við dómsmálaráðherra og Alþingi að varðskipið Óðinn verði varðveitt í núverandi ástandi og fært Sjóminjasafninu í Reykjavík til varðveislu. Rafn Sigurðsson, skipverji á varðskipinu Ægi, segir flesta starfsmenn Landhelgisgæslunnar þegar hafa skrifað undir áskorunina og að reynt verði að ná til sem flestra sem vilji styðja þennan málstað.