Á döfinni

Sjóminjasafninu barst á dögunum höfðingleg gjöf frá einum af velunnurum safnsins, Ásgeiri Long. Um er að ræða einstaka völundarsmíð Ásgeirs, sem er nákvæmt módel af gufuvél úr nýsköpunartogaranum Júlí GK frá Hafnarfirði, en Ásgeir sigldi á sínum tíma með Júlí og vann í vélarrúminu. Mikil vinna liggur á bak við gerð slíks módels og er ekki fráleitt að ætla að greiða þyrfti um eina milljón króna fyrir vinnuna við gerð þess.

Veruleg fjölgun gesta Sjóminjasafnsins varð á milli sumarmánaða 2007 og 2008. Nærri lætur að gestafjöldi hafi þrefaldast á milli áranna, sé miðað við fjölda gesta í júní, júlí og ágúst. Viðtökur hafa því verið framar vonum eftir að safnið enduropnaði á Hátíð hafsins um mánaðarmótin maí/júní sl. Þessi fjölgun hefur jafnframt átt sér stað þrátt fyrir að húsið sé í raun ennþá á byggingarstigi utandyra og allt aðgengi að safninu hefur verið erfitt sökum framkvæmda við byggingu þriðju hæðar og klæðningar hússins.

Metaðsókn var í Víkina þegar safnið var enduropnað á Hátíð hafsins eftir gagngerar breytingar og stækkun á sýningarými safnsins. Forseti Íslands, hr. Ólafur Ragnar Grímsson, opnaði safnið formlega ásamt Gísla Jónssyni, fyrrum starfsmanni BÚR, en þeir félagar opnuðu einnig safnið fyrir þremur árum.

Varðskipið Óðinn hefur nú fengið nýtt hlutverk sem lifandi safn um þorskastríðin og björgunarsögu Landhelgisgæslunnar. Skipið liggur við sérstaka bryggju sem nú mun tilheyra Sjóminjasafninu og verða hluti þess. Einnig hefur dráttar- og lóðsbáturinn Magni verið afhentur safninu til varðveislu og liggur hann einnig við safnbryggjuna.

Framkvæmdir við stækkun og breytingar á húsnæði Sjóminjasafnsins standa nú yfir. Í vetur hafa staðið yfir gagngerar endurbætur á elstu hlutum hússins og nú er móttökusalur kominn í notkun á neðri hæð þar sem áður voru frystitæki og losun á slori.