Á döfinni

Í tilefni af uppsetningu á sýningu um 95 ára afmæli Eimskipafélags Íslands mun Sjóminjasafnið hafa ókeypis aðgang í fjórar vikur frá 18. janúar. Er öllum landsmönnum boðið að skoða sýninguna og safnið og kynnast þar sögu Eimskipafélagsins og jafnframt útgerðarsögu Reykjavíkur um leið. Safnið verður opið alla daga vikunnar, nema mánudaga, frá kl. 13 - 17, og er vonast til að sem flestir eigi þess kost að heimsækja safnið næstu vikurnar.

Hinn 17. janúar sl. var opnuð sýning í Sjóminjasafninu í tilefni af 95 ára afmæli Eimskipafélags Íslands. Jafnframt var haldið upp á afmæli félagsins í safninu og var m.a. öllum starfsmönnum boðið í hóf í safninu. Sýningin er sett upp í samvinnu við félagið og eru á sýningunni ýmsir munir úr sögu Eimskipafélagsins, skipalíkön og myndir. Á sýningunni má jafnframt sjá hin þekktu dagatöl Eimskipafélagsins, sem félagið hefur gefið út í rúm 80 ár, nánast samfellt.

Í upphafi ársins lét Sigrún Magnúsdóttir af starfi forstöðumanns safnsins og við því starfi tók Eiríkur P. Jörundsson. Sigrún hafði gegnt starfi forstöðumanns frá upphafi safnsins og veitti hún einnig forstöðu undirbúningsnefnd að stofnun safnsins allt frá árinu 2001. Hún er þó ekki hætt störfum hjá Sjóminjasafninu og mun starfa áfram sem kynningarfulltrúi safnsins.