Á döfinni

Starfsmenn Landhelgisgæslunnar hafa hrundið af stað undirskrifasöfnun þar sem þess er farið á leit við dómsmálaráðherra og Alþingi að varðskipið Óðinn verði varðveitt í núverandi ástandi og fært Sjóminjasafninu í Reykjavík til varðveislu. Rafn Sigurðsson, skipverji á varðskipinu Ægi, segir flesta starfsmenn Landhelgisgæslunnar þegar hafa skrifað undir áskorunina og að reynt verði að ná til sem flestra sem vilji styðja þennan málstað. Hann hvetur því alla til að skrifa undir áskorunina og segir að þeir sem leiti eftir því geti haft samband við sig í síma 899 0367 eða sent tölvupóst á netfangið rafn@btnet.is.

Í formála undirskriftalistans segir: "Undirrituð fara þess á leit við dómsmálaráðherra og hið háa Alþingi, að varðskipið Óðinn verði varðveitt í því ástandi sem það er og fært til Sjóminjasafnsins til varðveislu. V/s Óðinn á sér stórmerka sögu og hefur varðveist að megninu til óbreyttur. Vélbúnaður skipsins og íbúðir eru upprunalegar og sögulegt gildi þess er gríðarlegt. Varðskipið Þór var eyðilagt og ætti að hljóta hina votu gröf og þjóna sem æfingaraðstaða fyrir kafara. Látum ekki það sama henda varðskipið Óðinn, skip sem smíðað var fyrir Ísland, barðist fyrir Ísland og bjargaði fjölda manna á sérlega giftursömum ferli."

Hér að neðan er tilbúin "ljósmynd" þar sem búið er að setja Óðinn við bryggjukant Sjóminjasafnsins í Reykjavík, en myndin gefur einhverja hugmynd um það hvernig skipið myndi taka sig út við safnið.