Á döfinni

Hinrik Bjarnason og Kolfinna Bjarnadóttir hafa afhent Víkinni – Sjóminjasafninu í Reykjavík, minjasafn sitt sem þau hafa komið sér upp í áratugi. Um er að ræða nærri 700 muni. Formleg afhending fór fram 31. maí sl. og um leið var opnuð sýning á þessu einstaka minjasafni hjónanna sem ber heitið Úr ranni forfeðranna. Þessi höfðinglega gjöf er mikill virðingarvottur við ársgamla sjálfseignarstofnun um Sjóminjasafn í Reykjavík.

Þau Hinrik og Kolfinna söfnuðu um árabil ómetanlegum munum og minjum frá fyrri tímum. Afraksturinn er veglegt safn muna úr ranni forfeðranna sem ber með sér sögu handverks og nytjahluta horfinna tíma. Safn þeirra telur nærri sjö hundruð muni sem tengjast heimilum og störfum bæði til sjávar og sveita. Heimilin voru með svipuðu yfirbragði og hlutir á þeim hliðstæðir hvort sem fólk bjó við sjóinn á Stokkseyri eða inn til landsins í Blöndudal. Sú horfna menning og það samfélag sem sýningin Úr ranni forfeðranna gefur innsýn inn í og munirnar vitna um – gerir lítinn greinarmun á sveitabændum og sjávarbændum.

Hjónin koma frá sinn hvorum landsfjórðungnum, Hinrik er fæddur  að Ranakoti á Stokkseyri og Kolfinna ólst upp á Blöndudalshólum í Blöndudal. Þau hafa bæði unnið við að miðla arfleifð feðranna til landsmanna sem og við fræðslu barna og ungmenna gegnum tíðina.  Þekkingu og fræðslu hafa þau dýpkað með því að safna munum og minjum sem bera sögunni glöggt vitni.

Frá formlegri viðtöku á minjasafni Hinriks og Kolfinnu. Árni Þór Sigurðsson, varaformaður stjórnar safnsins, í ræðupúlti.