Á döfinni

Óhætt er að fullyrða að gamla BÚR húsið við Grandagarð sé í mikilli endurnýjun lífdaga um þessar mundir. Nú verða senn liðin tvö ár frá formlegri stofnun Sjóminjasafnins, þann 30. nóvember 2004, og síðan safnið tók til starfa í janúar 2005 hefur verið unnið jafnt og þétt að því að standsetja allt húsnæði safnsins, sem er tæpir 2.000 fermetrar á tveimur hæðum. Á efri hæðinni hefur sýningin Togarar í 100 ár verið vel sótt frá opnun í júní 2005 en mest hefur verið unnið í húsnæðinu á neðri hæð. Þar hefur nýstofnað félag, Matur – saga – menning, leigt 300 fermetra húsnæði undir sína starfsemi, en markmið félagsins er að kynna með sýningum og veitingum íslenska matarhefð fyrr og síðar. Í norðurenda neðri hæðar hefur Sjóminjasafnið síðan standsett 220 fermetra rými sem geymsluhúsnæði, en safnið hafði áður geymslurými í Faxaskála, sem nú er verið að rífa niður. Sjá nánar um sögu hússins.

En þótt húsnæðið á neðri hæðinni hafi verið hrátt og nánast einungis fokhelt að stórum hluta, hafa ýmsir aðilar sóst eftir afnotum af salarkynnum safnsins. Leikhópar ungra og efnilegra leikara þótti plássið tilvalið sem leikhúsrými og í sumar hafa verið sett þar upp og sýnd þrjú leikrit. Nú síðast hefur leikritið Penetreitor verið sýnt fyrir fullu húsi og hefur það fengið einstakar viðtökur og dóma, bæði leikhúsgesta og gagnrýnenda.

Það hefur því verið líf og fjör í gömlu Bæjarútgerðinni síðustu vikur og mánuði og má við þetta bæta að í suðurhluta hússins, næst Mýrargötu, hefur allt húsnæðið verið tekið í gegn undir starfsemi fyrirtækja. Á neðstu hæðinni er heildsalan Forval og á annarri og þriðju hæð starfar nú tölvuleikjafyrirtækið CCP, sem náð hefur góðum árangri með tölvuleikinn eve-online á Netinu. Um þessar mundir er verið að leggja lokahönd á hönnun á útliti hússins og er reiknað með að í vetur hefjist vinna við klæðningu þess, þannig að húsið verður án efa glæsilegt útlits um þetta leyti að ári.

Horft inn í nýtt geymsluhúsnæði safnsins í norðurenda á neðri hæð hússins.

Leiksalurinn á neðri hæð þar sem sýningar á Penetreitor standa nú yfir.