Á döfinni

Stofnfundur Sambands íslenskra sjóminjasafna var haldinn í Sjóminjasafninu í Reykjavík 15. október s.l. að viðstöddum fulltrúum þeirra safna sem undirrituðu lög og stofnskrá sambandsins. Söfnin sem standa að stofnuninni eru Byggðasafn Vestfjarða, Síldarminjasafn Íslands, Sjóminjasafn Austurlands, Sjóminjasafnið á Eyrarbakka, Byggðasafn Garðskaga, Víkin-Sjóminjasafnið í Reykjavík, Byggðasafnið að Görðum, Byggðasafnið á Hnjóti og vænta má þess að Sjóminjasafnið á Húsavík gerist einnig aðili að sambandinu. Á fundinum kom fram að stofnun sambandsins er stórt skref sem aðstandendur vonast til að skili gifturíkum árangri. Margrét Hallgrímsdóttir, þjóðminjavörður, stjórnaði stofnfundinum og taldi stofnun sambandsins vera "afar farsælt skref" við uppbyggingu sjóminjasafna á Íslandi. Kosin var stjórn nýja sambandsins og hana skipa Örlygur Kristfinnsson frá Síldarminjasafninu, sem jafnframt er formaður, Jón Sigurpálsson frá Byggðasafni Vestfjarða og Ágúst Ó. Georgsson, sem tilnefndur er af hálfu Þjóminjasafns Íslands. Helgi M. Sigurðsson frá Sjóminjasafninu í Reykjavík var kjörinn varamaður og varafulltrúi Þjóðminjasafnsins er Lilja Árnadóttir.

Samband íslenskra sjóminjasafna mun hafa eftirtalin markmið: að skapa umræðuvettvang um sjóminjar, að efla og skipuleggja varðveislu sjóminja, að koma á samstarfi um skráningu, að efla rannsóknir á sögu sjómennsku, siglinga og strandmenningar, að efna til samstarfs um sýningar, að stunda sameiginlega  kynningu á sjóminjum Íslands og síðast en ekki síst að berjast fyrir stofnun bátafriðunarsjóðs.

Að stofnfundi loknum var opnuð ljósmyndasýningin Í síldinni á Sigló, er þar getur að líta myndir Hannesar Baldvinssonar, sem teknar voru á Siglufirði á árunum 1958 til 1962. Þetta eru bráðskemmtilegar svipmyndir úr mannlífinu og vinnu karla, kvenna og barna á síldarbryggjunum fyrir norðan. Sýningin er samstarfsverkefni Sjóminjasafnsins í Reykjavík, Síldarminjasafnsins og ljósmyndarans.