Á döfinni

Hollvinasamtök varðskipsins Óðins voru stofnuð 26. október s.l. að viðstöddu fjölmenni í Víkinni – Sjóminjasafninu í Reykjavík. Björgun Óðni, sögunnar vegna eru einkunnarorð þessara nýju samtaka, sem stofnuð voru að frumkvæði Sjómannadagsráðs eftir tillögu Guðmundar Hallvarðssonar, þingmanns og formanns ráðsins. Markmið samtakanna er að gera varðskipið Óðinn að sögusafni þorskastríðsáranna og björgunarsögu íslenskra varðskipa og að skipið verði fært Sjóminjasafninu og því komið fyrir í höfninni framan við safnið.

Fullt var út úr dyrum á stofnfundi samtakanna og þar fluttu ávörp hr. Ólafur Ragnar Grímsson forseti Íslands, Björn Bjarnason dómsmálaráðherra, Vilhjálmur Þ. Vilhjálmsson borgarstjóri og Stefán Jón Hafstein, stjórnarformaður Víkurinnar. Í ræðum þeirra kom vel fram að nú væri ekki aðeins fágætt tækifæri til að varðveita varðskipið Óðinn og gera það að safni þorskastríðsáranna og björgunarsögu varðskipanna, heldur bæri Íslendingum beinlínis skylda til að tryggja varðveislu skipsins og halda á lofti þeirri merkru sögu sem skipið stendur fyrir.

Varðskipið Óðinn er eina skip Landhelgisgæslunnar í dag sem tók þátt í öllum þremur þorskastríðunum á síðustu öld, þegar fiskveiðilögsagan var færð út í 12 mílur, 50 mílur og síðast 200 mílur. Skipið er að mestu óbreytt frá því það var smíðað árið 1959 og er talið að aðalvélar skipsins séu einu Burgmeister&Wain skipavélarnar í heiminum sem enn eru gangfærar.

Í 2. gr. laga um Hollvinasamtök varðskipsins Óðins sem samþykkt voru á fundinum segir:

Markmið samtakanna er

a) að varðveita varðskipið Óðinn, aðra muni og minjar sem tengjast sögu þorskastríðsáranna milli Íslendinga og Breta

b) að ná til sem flestra muna, mynda og annarra minja er stuðla að sem mestum fróðleik og staðreyndum, sögu og sagna þorskastríðsáranna

c) að varðveita sögu Óðsins sem varðskips við löggæslu, björgun sæfarenda og skipa við Ísland

d) að vinna að því að fast fjárframlag fáist á ári hverju til reksturs og viðhalds skips, muna og minja

e) að Víkin Sjóminjasafnið í Reykjavík, yfirtaki Óðinn, muni og minjar þorskastríðsáranna og tengi við starfsemi sína.

Stjórn samtakanna verður skipuð 8 mönnum og eiga eftirtalin félög, samtök og fyrirtæki fulltrúa í stjórn: Farmanna- og fiskimannasamband Íslands, Félag vélstjóra og málmtæknimanna, Fjöltækniskóli Íslands, Öldungaráð LHG, Sjómannadagsráð Reykjavíkur, Sjómannasamband Íslands, Slysavarnarfélagið Landsbjörg og Víkin Sjóminjasafnið í Reykjavík.