Á döfinni

Þorgerður Katrín Gunnarsdóttir, menntamálaráðherra, og Einar K. Guðfinnsson, sjávarútvegsráðherra, undirrituðu 14. desember 2006 samkomulag við Víkina – Sjóminjasafnið í Reykjavík um fjárhagslegan stuðning við uppbyggingu safnsins á næstu þremur árum. Samtals nemur styrkurinn 30 milljónum króna og fær safnið 10 milljónir árlega næstu þrjú árin, frá 2007 – 2009.

Þessi stuðningur er afar mikilvægur ungri sjálfseignarstofnun sem Víkin – Sjóminjasafnið í Reykjavík er. Sjóminjasafnið fagnaði því 30. nóvember s.l. að tvö ár voru þá liðin frá því að safnið var formlega stofnað. Starfsemi safnsins hófst í ársbyrjun 2005 og fyrsta sýningin var opnuð á Hátíð hafsins í byrjun júní sama ár. Safnið er starfrækt í fyrrum frystihúsi Bæjarútgerðar Reykjavíkur við Grandagarð og hefur það verið eitt helsta verkefnið að breyta þessu gamla frystihúsi í safnhús, sem er kostnaðarsamt eins og gefur að skilja. Með góðum stuðningi Faxaflóahafna, sem er eigandi húsnæðisins, og nú ríkisstjórnar Íslands eru þær umbreytingar að komast á lokastig og verður lokið við að klæða húsið og koma því í fulla notkun á næsta ári, 2007. Auk tveggja fyrrgreindra stuðningsaðila styðja rekstur safnsins annars vegar Reykjavíkurborg og hins vegar bakhjarlar safnins; Eimskip, Glitnir og HB Grandi.

Sigrún Magnúsdóttir, forstöðurmaður, Stefán Jón Hafstein, formaður stjórnar safnsins, Einar K. Guðfinnsson sjávarútvegsráðherra og Þorgerður Katrín Gunnarsdóttir menntamálaráðherra undirrituðu samkomulagið í lúkar safnsins úr gömlu síðutogurunum.