Á döfinni

Á Safnanótt 23. febrúar sl. ríkti mikið fjör á Grandanum, enda komu hátt í 1000 gestir um kvöldið í húsnæði Sjóminjasafnsins! Móttökusalur safnsins var með frönsku yfirbragði og leikin sjómannatónlist frá Paimpol. Fjölbreytt dagskrá var allt kvöldið og má þar nefna opnun málverkasýningar Bjarna Jónssonar, erindi Elínar Pálmadóttur um Fransmenn á Íslandsmiðum, Steinunn Þórhallsdóttir sagði frá skollafrönsku, eða golfrönsku, og Hinrik Bjarnason leiddi gesti um sýninguna Úr ranni forfeðranna . Og síðast en ekki síst tróðu Gíslarnir tveir, fyrrverandi og núverandi bæjarstjóri Akraness, upp með hljóðfæraleik og söng og héldu sannarlega uppi fjörinu hjá safngestum. Á neðri hæð gafst gestum kostur á að skoða árabát í smíðum og seglasaum.

Söngur og hljóðfærasláttur Gíslanna vakti mikla lukku safngesta.

Opnuð var sýning á málverkum Bjarna Jónssonar um gamla árabátatímann.

Fjölmargir hlýddu á erindi Elínar Pálmadóttur um Fransmenn á Íslandsmiðum.

Hinrik Bjarnason sagði gestum söguna á bak við munina í sýningunni Úr ranni forfeðranna.