Á döfinni

Stjórn Sjóminjasafnsins hefur ákveðið að fella niður aðgangseyri að safninu fram til 18. ágúst, vegna þeirra framkvæmda sem nú standa yfir við húsnæði safnsins. Frá og með 19. ágúst verður safninu lokað fram í nóvember, en þá verður tekin í notkun nýr móttökusalur á neðri hæð um leið og opnuð verður ný sýning í svokölluðum Bryggjusal í fyrrum vélarsal BÚR. Sýningin er sett upp í tilefni af því að á þessu ári verða 90 árum liðin frá því að fyrstu framkvæmdum lauk við Reykjavíkurhöfn, en gerð Reykjavíkurhafnar á árunum 1913 til 1917 voru stærstu framkvæmdir Íslandssögunnar á þeim tíma.

Á næstu vikum hefst vinna við að stækka útveggi safnsins að hluta og er ætlunin að færa innganginn meira í áttina að Kaffivagninum og færa um leið afgreiðsluna á neðri hæð. Þar verður einnig sett upp safnbúð og innangengt verður í safnkaffi í veitingasal á neðri hæð. Inn af nýjum 200 fermetra móttökusal verður gengið út á endurgert þilfar Gullfoss frá 1915 og þaðan inn í nýja Bryggjusalinn. Þar verður Hafnarsýningin sett upp og ganga gestir niður landgang af þilfari Gullfoss niður á trébryggju, sem verður umflotin sjó. Áætlað er að sýningin verði opnuð í lok nóvember.