Á döfinni

Fjölmenni var í Víkinni - Sjóminjasafninu í Reykjavík þegar fyrsta sýningin var opnuð í Bryggjusalnum, nýjum sýningarsal safnsins, þann 1. desember s.l. Sýningin er sett upp í tilefni af 90 ára afmæli Reykjavíkurhafnar og hlaut hún yfirskriftina Lífæð lands og borgar. Opnun sýningarinnar markaði jafnframt mikilvæg tímamót í stuttri sögu Sjóminjasafnsins, sem fagnaði þriggja ára afmæli sínu 30. nóvember s.l., því samtímis var tekinn í notkun nýr sérinngangur safnsins og nýtt 250 fermetra móttrými á neðri hæð.

Hefur safninu vaxið verulega fiskur um hrygg undanfarin misseri og fleiri landvinningar framundan. Safnið hefur frá upphafi verið í leiguhúsnæði í hluta af fyrrum húsnæði BÚR við Grandagarð, sem hefur verið í eigu Faxaflóahafna, en stjórn fyrirtækisins ákvað á dögunum að færa Sjóminjasafninu húsnæðið að gjöf, samtals um 1800 fermetra, og ætla Faxaflóahafnir jafnframt að standa straum af kostnaði við einangrun og klæðningu hússins að utan. Sjóminjasafnið verður eigandi húsnæðisins frá og með 1. janúar n.k. og er þessi höfðinglega gjöf Faxaflóahafna afar mikilvæguir áfangi til þess að tryggja áframhaldandi tilveru og uppbyggingu safnsins.

Einar K. Guðfinnsson, sjávarútvegsráðherra, og Gísli Gíslason, hafnarstjóri Faxaflóahafna, kampakátir með Gísla hafnarverkamann á milli sín. Sigrún Magnúsdóttir, forstöðukona safnsins, fylgist með.

Nýtt móttökurými á neðri hæð Sjóminjasafnsins.

Björn Ingi Hrafnsson, stjórnarformaður Faxaflóahafna, heldur tölu af þilfari Gullfoss.

Árni Tryggvason flutti kvæðið Við höfnina eftir Tómas Guðmundsson.

Þorgeir Ástvaldsson og Ragnar Bjarnason léku og sungu sjómannalög við góðar undirtektir.

Árni Þór Sigurðsson, stjórnarformaður Víkurinnar, flutti ávarp við opnun sýningarinnar.