Á döfinni

Framkvæmdir við stækkun og breytingar á húsnæði Sjóminjasafnsins standa nú yfir. Í vetur hafa staðið yfir gagngerar endurbætur á elstu hlutum hússins og nú er móttökusalur kominn í notkun á neðri hæð þar sem áður voru frystitæki og losun á slori. Gamli vélarsalur hússins er nú orðinn að glæsilegum sýningarsal, Bryggjusal, og búið er að ganga frá sérinngangi safnsins og stigagangi milli hæða. Húsnæðið er því að mestu orðið frágengið innandyra með fimm sýningarsölum og fimm nýjum sýningum.

Nú standa yfir framkvæmdir við húsið að utanverðu, klæða á allt húsið, byggja ofan á það þriðju hæðina og byggja yfir svalir í norðurenda. Faxaflóahafnir hafa gert upp bryggjuna næst safninu, þar sem varðskipið Óðinn hefur lagst að og verður skipið hluti af safninu. Einnig er dráttar- og lóðsbáturinn Magni orðinn hluti af safninu og sómir sér vel við safnbryggjuna.

Teikning af útliti hússins eftir að framkvæmdum lýkur síðar á árinu.

Framkvæmdir á fullu 14. maí sl.

Varðskipið Óðinn og dráttarbáturinn Magni við safnbryggjuna.