Á döfinni

Varðskipið Óðinn hefur nú fengið nýtt hlutverk sem lifandi safn um þorskastríðin og björgunarsögu Landhelgisgæslunnar. Skipið liggur við sérstaka bryggju sem nú mun tilheyra Sjóminjasafninu og verða hluti þess. Einnig hefur dráttar- og lóðsbáturinn Magni verið afhentur safninu til varðveislu og liggur hann einnig við safnbryggjuna.

Árni M. Mathiesen fjármálaráðherra afhenti Hollvinasamtökum Óðins varðskipið við hátíðlega athöfn 30. maí sl., sem haldin var um borð í skipinu. Björn Bjarnason dóms- og kirkjumálaráðherra, sem jafnframt er æðsti yfirmaður Landhelgisgæslunnar, flutti ávarp við athöfnina. Guðmundur Hallvarðsson, formaður hollvinasamtakanna og einnig sjómannadagsráðs, tók við skipinu fyrir hönd samtakanna.

Daginn eftir, við enduropnun Sjóminjasafnsins, afhenti Guðmundur síðan Vilhjálmi Þ. Vilhjálmssyni, stjórnarformanni safnsins, og Sigrúnu Magnúsdóttur, forstöðumanni Sjóminjasafnsins, skipið til varðveislu við sérstaka bryggju Sjóminjasafnsins sem Faxaflóahafnir hafa í vetur gert upp og styrkt til að taka við Óðni.

Hollvinasamtök varðskipsins Óðins voru stofnuð 26. október 2006 að viðstöddu fjölmenni í Víkinni – Sjóminjasafninu í Reykjavík. Björgun Óðni, sögunnar vegna eru einkunnarorð samtakanna, sem stofnuð voru að frumkvæði Sjómannadagsráðs eftir tillögu Guðmundar Hallvarðssonar, formanns ráðsins.

Þá afhenti Júlíus Vífill Ingvarsson, formaður stjórnar Faxaflóahafna, gamla Magna til Sjóminjasafnsins þar sem hann verður við safnabryggjuna í vörslu safnsins.  Það var Vilhjálmur Þ. Vilhjálmsson, formaður stjórnar Sjóminjasafnsins, sem tók við Magna. 

Varðskipið var flutt yfir til Sjóminjasafnsins 28. febrúar sl., í hríðarbyl, en eftir að skipið lagðist að bryggju stytti upp.