Á döfinni

Sjóminjasafninu barst á dögunum höfðingleg gjöf frá einum af velunnurum safnsins, Ásgeiri Long. Um er að ræða einstaka völundarsmíð Ásgeirs, sem er nákvæmt módel af gufuvél úr nýsköpunartogaranum Júlí GK frá Hafnarfirði, en Ásgeir sigldi á sínum tíma með Júlí og vann í vélarrúminu. Mikil vinna liggur á bak við gerð slíks módels og er ekki fráleitt að ætla að greiða þyrfti um eina milljón króna fyrir vinnuna við gerð þess. Gjöfin er því sannarlega höfðingleg, en áður hafði Ásgeir m.a. gefið safninu kvikmynd sem hann gerði úr upptökum hans úr veiðiferð með Júlí árið 1950 og var myndin sýnd í safninu á sýningunni Togarar í 100 ár. Gufuvélin verður sett upp til sýningar innan skamms, auk ljósmynda Ásgeirs sem hann tók um borð í Júlí árið 1950.

Vilhjálmur Þ. Vilhjálmsson, stjórnarformaður safnsins, Ásgeir Long og Sigrún Magnúsdóttir, forstöðumaður safnsins, við afhendingu hinnar höfðinglegu gjafar Ásgeirs. Módelið má sjá á borðinu fyrir framan þau.