Á döfinni

Hinn 17. janúar sl. var opnuð sýning í Sjóminjasafninu í tilefni af 95 ára afmæli Eimskipafélags Íslands. Jafnframt var haldið upp á afmæli félagsins í safninu og var m.a. öllum starfsmönnum boðið í hóf í safninu. Sýningin er sett upp í samvinnu við félagið og eru á sýningunni ýmsir munir úr sögu Eimskipafélagsins, skipalíkön og myndir. Á sýningunni má jafnframt sjá hin þekktu dagatöl Eimskipafélagsins, sem félagið hefur gefið út í rúm 80 ár, nánast samfellt. Dagatölin eru leiðarstef í sýningunni og á hverju dagatali er texti þar sem getið er þess helsta sem var á döfinni hjá Eimskipafélaginu á hverju ári, auk helstu tíðinda úr sögu lands og þjóðar. Margar glæsilegar ljósmyndir og teikningar prýða dagatöloin, en auk þess má lesa úr þeim þróun í hönnun og prenttækni frá 1929 til 2007.